Pardes Mein Hajj Ke Ayyam: Hamari Khamosh Qurbani, Des Ki Yaadein Aur Eid Ki Namaz
Zul-Hijjah ka chaand nazar aate hi fiza mein ek ajeeb si roohaniyat bikhar jaati hai. Yahan Saudi Arabia mein, jahan hum muqeem hain, hajj ke in babarkat dinon ki ek alag hi kaifiyat hai. Makkah Mukarma ki taraf jaane wale qafilon ki goonj aur har taraf chhayi hui ek khaas khamoshi, dil ko ajeeb se ehsas mein mubtala kar deti hai. Lekin hum pardesiyon ke liye yeh das din, Eid-e-Qurban ki aamad ka ehsas ek aisa tufan lekar aate hain jo hamare andar ki saari yaadon ko jaga dete hain.
Hamari aankhein jab band hoti hain, to hamein yahan ki sarkein nahi, balki apne des ki woh galiyan nazar aati hain jahan eid se kayi din pehle hi raunaq shuru ho jaati hai. Woh galiyon mein bandhe hue janwaro ka shor, unke chabane ki aawazein, aur woh masoom bachon ki khushi jo naye kapde pehen kar bakron ko ghaas daalne ke liye ek doosre se baazi le jaate hain. Woh manzar, jab ghar ke sehne mein qurbani ki taiyariyan ho rahi hoti hain, chhriyon ki dhaar tez karne ki aawazein, aur bachon ka woh besakhta shor o ghal jo poore muhalle ko apni lapet mein le leta hai. Woh sab kuch kitna haseen aur kitنا pursukun hota hai, hai na?
Phir eid ki subah ka woh khaas lamha aata hai—eid ki namaz! Apne des mein jab hum eid gah ki taraf jaate hain, toh raste mein apne dost, ahbaab, rishtedaar aur muhalle ke buzurg milte hain. Har koi ek doosre ko gale laga raha hota hai, "Eid Mubarak" ki sadaayein goonj rahi hoti hain. Woh namaz ke baad ka manzar, jab sab log gale mil kar apne purane gale shukwe mita dete hain, woh ek khaas qism ka ittehad aur sukon hota hai jo sirf apne watan ki mitti mein hi milta hai. Ghar wapas lautte waqt doston ke sath woh gup shup, aur ghar pohnch kar nashte ki mez par sab ka ek sath baithna—yeh sab yaadein us waqt aankhon mein nami le aati hain.
Lekin yahan pardes mein eid ki namaz ka tajruba bohat mukhtalif hota hai. Yahan namaz to hoti hai, masjidien bhi bhari hoti hain, lekin woh apnaiyat aur woh chehre nazar nahi aate jinhein dekhne ka dil muntazir hota hai. Yahan namaz padh kar jab hum bahar nikalte hain, toh har koi apni apni duty ya apne kamron ki taraf bhaag raha hota hai. Yahan eid milan ke liye woh rawayati gale milne ka silsila nahi hota; bas ek doosre ko dekh kar muskura dete hain, ek doosre ko "Eid Mubarak" kehte hain, aur phir wahi tanhai ka safar shuru ho jata hai. Yahan dil ke kisi kone mein yeh kasak zaroor hoti hai ki kaash! Is saf-e-namaz mein woh dost, woh bhai, ya woh walid khade hote jinke sath hum bachpan se eid ki namaz padhte aaye hain.
Yahan na to galiyon mein janwaron ka woh shor hota hai, na bachon ki woh masoom cheikhein, aur na hi eid ki woh rawayati gahma gahmi. Yahan eid to bas us din ka naam hai jab subah sawere uth kar phone call milayi jaati hai. Woh phone call, jismein ghar walon ki aawazein sun kar aisa lagta hai jaise hum bhi wahin, ghar ke usi sehne mein mojood hain. Bachon ki woh zid, "Abu, aap kab aayenge? Eid par to sab ke abu ghar hote hain!" Yeh jumle kisi khanjar se kam nahi hote, magar hum pardesiyon ko apni muskurahat ke peeche yeh sare zakham chhupane padte hain.
Bakra Eid ka yeh mausam hamein yaad dilata hai ki hum yahan kyun hain. Hajj ke in mubarak dinon mein, jabki duniya bhar ke musalman ek markaz par jama ho rahe hote hain, hum yahan apni ek taweel "qurbani" de rahe hote hain. Yeh qurbani sirf maal o daulat ki nahi, balki apno se doori ki, apni jawani ke behtareen lamhat ki, aur apne bachon ki muskurahaton aur unke qeemti bachpan ko mobile ki screen par dekhne ki qurbani hai. Hum yahan gadi ke steering par hon, kisi dukan par khade hon, ya apni dutyiyon mein masroof hon, hamara zehan aur hamari rooh har waqt apne ghar ke us sehne mein hoti hai jahan eid ki taiyariyan apne urooj par hoti hain.
Yeh jo hum din raat mehnat kar rahe hain, yahi hamari asal qurbani hai. Hum yahan isliye paseena baha rahe hain taake hamare ghar walon ke chehron par eid ki woh raunaq qaim reh sake. Hum yahan khud ko tanha mehsus karte hue bhi apne pyaron ke liye khushiyan aur unka sunehra mustaqbil kharid rahe hote hain.
Aane wali Eid-e-Qurban par, jab duniya khushiyan mana rahi hogi, hum pardesi apni isi khamosh zindagi ke sath khade honge. (Mayoos) hone ki zaroorat nahi, kyunki hamari yeh mehnat aur hamari yeh doori raaygaan nahi jayegi. Ek din wahi galiyan hongi, wahi namaz ki safein hongi, aur wahi eid ka purshor mahaul hoga, aur aap bhi apne pyaron ke sath mojood honge. Yeh waqt ek imtihan hai, jise hum ne muskura kar guzaarna hai.
Aakhir mein bas itna hi kehna chahunga ke hausla rakhein, kyunki:
Ki hoya main pardesi hoya, par sada pardesi nahi rehna
Ek din mere mola ne karam kamana, ral sangat_an naal behna
Tamam pardesi bhaiyon ko, jo is waqt apne gharon se door is maqaddas mauqe par apne faraiz saranjam de rahe hain, bohat bohat himmat aur Eid-e-Qurban ki peshgi mubarakbad. Khuda hum sab ke liye aasaniyan paida kare aur humein jald apne pyaron ke sath mil kar eid manane ka mauqa ata farmaye.
Is tehreel ke bare mein aapki kya raye hai? Comment box mein apne khayalat ka izhaar zaroor karein, hamein aapke comments ka shiddat se intezar rahega.
Aapki duaaon ka talabgar, Sagar Pardesi
Comments
Post a Comment